БИШКЕК, 14-июн. — Sputnik. Жогорку Кеңеш өкмөттүн 2017-жылы жасаган иши боюнча отчетту канааттандырды. Депутаттарды 96сы колдоого алса, 5 депутат каршы болду.
КСДП фракциясынын башчысы Иса Өмүркулов өкмөттүн 2017-жылдагы ишин канааттандырарлык деп табууну сунуштады.
Депутат Исхак Масалиев өкмөттүн 2017-жылдагы ишин канааттандыраарлык эмес деп табуу керектигин, антпесе эртең башкача оюндар болуп кетерин айтты. Ал 2017-жылдын жарымынан тарта өкмөттү Сапар Исаков жетектегенин, эки ай мурун ушул эле Жогорку Кеңеш тарабынан ишеним көрсөтүлбөй отставкага кеткенин эске салды.
"Калыстык менен карап канааттандыраарлык эмес деп тапканыбыз туура болот", — деди депутат.
Депутат Тазабек Икрамов өкмөттүн 2017-жылдагы отчетун колдоо керектигин айтты. Мурунку премьер Сапар Исаков жалпы өкмөттүн жасаган иши эмес, өзүнүн иш-аракеттеринен улам кеткенин кошумчалады.
Эл өкүлү Төрөбай Зулпукаров Сапар Исаковдун жеке өзүнө ишеним көрсөтүлбөгөнүн белгиледи. Өкмөттүн 2017-жылдагы отчетун жактырып-жактырбоо Исаковдун өкмөтүнө баа берүү дегенге жатпай турганын айтты.
Жыйындын соңунда премьер-министр Абылгазиев бардык депутаттарга ыраазычылык билдирип, туура чечим чыкканын белгиледи.
"Бүгүн кызуу талкуу болуп сабак ала турган ой-пикирлер айтылды. Туура чечим чыкты. Сын пикирлерден жыйынтык чыгаруу эми бизден. Кырсыктан тышкары ден соолукта болгула", — деди өкмөт башчы.
Эске салсак, Абылгазиев премьер болуп быйыл апрель айынын аягында келген болчу. Ага чейин биринчи вице-премьер, президенттин кеңешчиси болуп иштеп келген.
2018-жылы 19-апрелде парламент Сапар Исаков башында турган өкмөткө ишеним көрсөтпөө боюнча чечим кабыл алып, президент Сооронбай Жээнбеков отставкага кетирүү боюнча Жарлыкка кол койгон.
